ЛАЈЛ и Ерик Менендез моментално отслужуваат доживотна затворска казна за убиствата на нивните родители, кои се случија на 20 август 1989 година во семејниот дом на Беверли Хилс. Но, 35 години подоцна, браќата Менендез може да добијат шанса да го преиспитаат нивниот случај додека обвинителите во Лос Анџелес истражуваат нови докази. Сепак, многумина ги интересира што се случило со богатството на нивните родители.
Дали браќата Менендез ги наследиле парите?
По смртта на нивните родители, браќата привремено ја презеле контролата врз имотот на нивниот татко, кој се проценува дека вреди приближно 14,5 милиони долари.
За само шест месеци, Лајл и Ерик наводно потрошиле речиси милион долари на забави, патувања и шопинг. Меѓутоа, по нивното апсење седум месеци подоцна, најголемиот дел од парите од наследството на Хозе биле потрошени за даноци и правни такси. Две години пред браќата да бидат осудени на доживотен затвор, извештаите покажале дека од имотот на нивните родители биле потрошени 10,8 милиони долари.
Околу половина од таа сума отишла на правни такси, вклучувајќи ги и трошоците на адвокатката Лесли Абрамсон, која тврдела дека Хозе и Кити со години им нанесувале емоционална и сексуална злоупотреба.
Го изгубиле пристапот до имотот
Откако биле прогласени за виновни за убиство на нивните родители, браќата изгубиле пристап до имотот. Според законите во Калифорнија, кога некој е убиен, сторителот не може да профитира од имотот на жртвата, без оглед на семејните односи. Нивната моментална нето вредност не е објавена во јавноста, но се претпоставува дека браќата немаат значителни финансиски средства, пишува „Hollywood Life“.
Дури и како најнови протагонисти на серијата на Рајан Марфи и Иан Бренан -„Monsters: The Lyle and Erik Menendez Story“, браќата веројатно нема да заработат финансиска добивка од ваквите проекти.