Премиерот Димитар Ковачевски утре во 11 часот ќе се обрати на официјалното отворање на канадската компанија „Магна Мирорс” во Технолошко-индустриската развојна зона во Струга.
На официјалното отворање свои обраќања ќе имаат Дејвид Креспи, потпретседател на компанијата „Магна Интернационал”, директорот на ТИРЗ Јован Депотовски, а ќе присуствува и вицепремиерот задолжен за економски прашања, координација на економските ресори и инвестиции Фатмир Битиќи како и претставници на менаџментот на компанијата.
Согласно агендата на организаторите, после официјалните обраќања ќе следи презентација и обиколка на новата инвестиција.
„Магна интернационал” е канадска компанија со глобално седиште во Онтарио-Канада, која дизајнира, развива и произведува автомобилски системи, модули и компоненти кои се испорачуваат на сите најзначајни производители на автомобили во светот.