Претседателот на Владата на Република Северна Македонија, Димитар Ковачевски, присуствуваше на седница на Советот за безбедност, свикана од страна на претседателот на државата, Стево Пендаровски.
На состанокот се разговараше за актуелната безбедносна состојба во државата, во регионот и во поширокиот евроатлантски простор, вклучувајќи ја и ситуацијата во Украина и во тој контекст, за првите недели од претседавањето на Северна Македонија со ОБСЕ, каде што членуваат 57 земји членки, вклучувајќи ја и Руската Федерација.
Посебен фокус е ставен на добрососедските односи, кон што, Република Северна Македонија е искрено посветена, во духот на европските вредности.
На седницата на Советот за безбедност, премиерот Ковачевски, ја сподели оценката со претседателот на државата, Пендаровски дека не смее да се дозволи, европската агенда, што е стратешка цел на нашата држава, како и билатералните односи со соседна Република Бугарија, да станат жртва на националистички и популистички политики, од која и да е страна.
Премиерот Ковачевски, на состанокот ги посочи европските перспективи на нашата држава како прашање од значење за стабилноста и економскиот развој на Северна Македонија, но и за стабилноста и безбедноста на целиот регион и посочи на потребата од одговорно однесување од сите политички лидери и субјекти, во реализацијата на оваа државна, стратешка цел, што е очекување и на мнозинството граѓани во нашата држава.