Еден од најпознатите парови во светот на шоубизнисот – Кети Пери и Орландо Блум – одлучи да тргне по различни патишта по речиси една деценија заеднички живот, потврди извор близок до парот за списанието Us Weekly.
„Кети и Орландо раскинаа, но остануваат во добри односи“, рече изворот, додавајќи дека во моментов нема конфликт меѓу нив и дека пејачката, и покрај нејзината тага, е олесната што нема да мора да помине низ уште еден развод.
Да потсетиме дека Пери се разведе од Расел Бренд во 2012 година, што го опиша како еден од најтешките периоди во нејзиниот живот.
Во криза со месеци
Проблемите во врската траат веќе некое време. „Имаше тензија меѓу нив со месеци, разделбата беше само прашање на време“, тврди инсајдер.
Иако често споделуваа заеднички моменти во јавност, односот беше внатрешно затегнат – делумно поради албумот на Пери „143“, кој не наиде на очекуваната реакција од публиката.
„Кети беше длабоко фрустрирана од приемот на албумот. Орландо се обиде да ја поддржи, но тензијата беше опиплива“, изјави извор за People.
Заедно од 2016 година
Пејачката и актерот се запознаа во 2016 година на забава по доделувањето на „Златните глобуси“. Три години подоцна, на Денот на вљубените, Блум ѝ предложи брак на Пери, а во август 2020 година ја добија ќерката Дејзи Дав. Во текот на викендот, Блум и Дејзи ѝ се придружија на Пери на турнејата во Австралија, каде што пејачката настапи во Перт. Сепак, се дознава дека веќе некое време живеат одвоено.
Иако некогаш планираа да имаат семеен дом заедно во Монтесито, Калифорнија, Пери сега одлучи да го изнајми просторот додека ја продолжува својата турнеја „Lifetimes“. Изворите велат дека таа и Блум претходно го поминувале поголемиот дел од времето на друг имот во истиот град.
Двојката сè уште официјално не ги коментираше гласините за разделбата, но има сè повеќе знаци дека нивната љубовна приказна е завршена.