Новокрунисаниот британски крал Чарлс Трети и кралицата Камила им мавтаа на толпата од балконот на Бакингемската палата во саботата, продолжувајќи ја традицијата од крунисувањето на Едвард Седми во 1902 година.
Водејќи го кралското семејство за прв пат на балконот на Бакингемската палата, Чарлс Трети со круна на главата, како и кралицата Камила, го гледаа прелетот на воени авиони и хеликоптери.
Меѓу кралското семејство беа и принцот Вилијам со неговата сопруга Кејт и нивните деца, принцезата Ана, како и многу млади членови на семејството. Принцот Хари не беше забележан меѓу нив.
Пред кралскиот излез на балконот, полицијата ја пушти толпата која стоеше зад барикадите да се приближи до палатата покрај авенијата.
Чарлс и Камила пристигнаа до Бакингемската палата по церемонијата на крунисувањето во Вестминстерската опатија. Во кочијата зад нив се возеле принцот Вилијам и неговата сопруга Кејт и нивните деца.
Чарлс е крал после смртта на неговата мајка, кралицата Елизабета Втора, во септември минатата година, по седум децении како престолонаследник.
Церемонијата на крунисувањето на новиот британски крал заврши со поздрав од балконот.