Дизајнерите од хрватската адвертајзинг-агенција „Bruketa & Žinić OM“ ја предизвикуваат идејата и општествените стереотипи за скапиот накит и облека како статусен симбол што ги издвојува едните од другите со концептот за „Инклузивен часовник“. Хрватските дизајнери предлагаат, наместо трчање по ексклузивни часовници и накит што важат за статусен симбол, да се направи нешто сосема поинакво – да се потпрете на ексклузивната работа што ве прави единствени, вашата фантазија.
Дизајнерите играат со старата едноставна идеја за лежерно цртање часовници по рака, која истовремено е забавна, израз на сечиј личен стил и креативност и интересна тема за започнување разговор со пријателите и со непознатите. Идејата е толку едноставна и игрива, а истовремено покрева дебата за клучно општествено прашање.
„Носењето часовник на рака ја изгуби првобитната цел бидејќи денес сите имаме мобилни телефони на кои може да се провери колку е часот. Сепак, многумина од оние што ги познаваме и понатаму купуваат скапи часовници што служат како накит или елемент што ќе ги издвои од другите. Ние затоа сакавме да му дадеме нова цел на рачниот часовник, спојувајќи ја креативноста што секој ја има во себе, без обѕир на општествениот статус“, велат главните дизајнери Давор Брукета и Никола Жиниќ.
Идејата за „Инклузивен часовник“ „Bruketa&Žinić ОМ“ ја работеа за брендот „Lega -Lega“. Сетот за часовникот може да се најде во онлајн-продавницата на „Lega-Lega“, a креативните идеи за часовниците може да се споделат на фејсбук-страницата https://www.facebook.com/InclusiveWatches .