Францускиот претседател Емануел Макрон верува дека Европа мора повторно директно да разговара со рускиот претседател Владимир Путин за да најде пат кон мир во Украина. Макрон изјави за неколку европски весници – вклучувајќи ги германскиот „Зидојче цајтунг“ и францускиот „Ле Монд“ – дека Европа не смее да ги делегира разговорите со Русија на Вашингтон.
„Мора да биде можно да се продолжи дијалогот со Русија. Зошто? Бидејќи денот кога ќе постигнеме мир, тој мир ќе влијае и на Европа“, рече францускиот претседател во интервју објавено денес. Ги обновивме каналите за дискусија на техничко ниво“, откри тој.
На прашањето дали сака да биде оној што ќе разговара со Путин, Макрон рече дека верува оти е потребен добро организиран европски пристап, но дека не треба да има премногу засегнати страни.
Кремљ вели дека Русија е подготвена да се врати на дијалог со Франција на претседателско ниво, пренесе ДПА.
„Имаше контакти, можеме да потврдиме дека, доколку е потребно и пожелно, ќе помогнеме во обновувањето на дијалогот на највисоко ниво што е можно поскоро“, изјави портпаролот на рускиот претседател Дмитриј Песков, како што објави руската новинска агенција Интерфакс.
„Долго време велиме дека е нелогично, контрапродуктивно и штетно за сите страни да ги сведат односите на нула“, нагласи Песков. Зборувајќи за подготвеноста на Макрон за директни разговори меѓу Европејците и Путин, Песков рече дека Москва е „импресионирана“ од тоа.
Советникот за надворешна политика на Макрон, Емануел Боне, неодамна беше во Москва, а германскиот канцелар Фридрих Мерц тогаш рече дека станува збор за координирана иницијатива.
Макрон и Путин последен пат разговараа по телефон на 1 јули минатата година, што беше нивна прва размена на мислења по три години. Портпаролот на Кремљ, исто така, рече дека Русија има за цел што поскоро да се врати на преговарачката маса за да се стави крај на војната во Украина.
Досега не е одреден датум за трилатерални разговори откако украинската и руската страна, под посредништво на САД, се сретнаа во Абу Даби минатата недела, додаде Песков. Рускиот министер за надворешни работи Сергеј Лавров во интервју за каналот НТВ изјави дека сè уште има многу работа во преговорите.