Познатиот режисер Кристофер Нолан, творец на хитови како „Мрачниот витез“ и „Опенхајмер“, е голем обожавател на франшизата за Џејмс Бонд и неколку пати изјавил дека би сакал да режира филм за најпознатиот филмски шпион.
По премиерата на научно-фантастичниот филм „Тенет“ од 2020 година, режисерот оскаровец изрази желба да режира нов филм за Бонд, но продуцентите Мајкл Г. Вилсон и Барбара Броколи одбија да соработуваат бидејќи не им се допаѓа неговиот креативен процес.
Имено, Нолан е познат како режисер кој сака да има целосна креативна контрола врз своите проекти. Неговите филмови често се амбициозни, визуелно впечатливи и содржат иновативни наративни структури. Но, Броколи инсистираше ниту еден режисер да не го има последниот збор кога станува збор за финалната верзија на филмот.
Како што пренесува Variety, Нолан не бил подготвен за таков компромис и наместо нов филм за британскиот таен агент, решил да го режира биографскиот филм „Опенхајмер“, кој заработи речиси милијарда долари во кината.
Нова ера за франшизата за Џејмс Бонд
Франшизата за Џејмс Бонд моментално минува низ период на транзиција. Откако Даниел Крег ја заврши својата ера со улога во филмот од 2021 година „Нема време за умирање“, се поставува прашањето кој ќе ја преземе улогата на познатиот шпион и кој ќе го режира следното продолжение.
Amazon, кој неодамна ја презеде целосната креативна контрола на серијалот, секако има големи планови за иднината на Бонд, а едно од клучните прашања останува изборот на режисерот кој ќе го обликува новиот правец на франшизата.
Нолан моментално работи на неговата адаптација на Одисеја, која треба да се појави во 2026 година, но останува отворено дали повторно ќе преговара со продуцентите за да режира еден од претстојните филмови за Бонд во иднина. Amazon би можел да биде клучен фактор во потенцијалните идни преговори, особено ако е подготвена да му даде поголеми овластувања на режисерот.