Потребно е да се направи само дополнување на законското решение, со кое ќе се прецизира дека недела е ден за одмор, а оние пак кои ќе ја работат треба да земат 50% повисока дневница, смета Конфедерацијата на слободни синдикати.
Според КСС, се останато кое е опција е неприфатливо бидејќ е дискриминирачки.
„КСС стои на ставот дека сегашното Законско решение само треба да се дополни и тоа: – Во членот 134 став 2 да стои: Ден за неделен одмор е недела. Секоја работа во недела се пресметува како прекувремена работа и се исплаќа дневница зголемена за 50%. Во членот 134 да се додаде став 3: Неделното работно време не смее да се продолжува во недела и важи од понеделник до сабота“, се вели во соопштението на КСС испратено до медиумите во кое додаваат:
„Сето друго сметаме дека е чист популизам. Од една страна трговците лицитираат и лобираат, од друга страна ќе се направи хаос во Законот за работни односи, доколку се опишува кои дејности треба да работат, а кои не. Во време на економска криза многу лесно може да се случи заради неработење во недела да се намалат платите и да се кратат работни места“.
КСС водејќи се по овие норми посочува дека во овој момент нивниот предлог е најприфатливо решение за сите страни кои се наоѓаат во процесот.