Инфлацијата во еврозоната нема да биде одржлива, смета претседателката на Европската централна банка (ЕЦБ) Кристин Лагард. Според неа, „инфлацијата во еврозоната може да доведе до повисоки плати и последователно повисоки цени, но досега ЕЦБ не гледа докази за тоа во податоците за договорените плати“.
Лагард рече дека ЕЦБ планира да ја задржи инфлацијата во рамките на сегашната цел од 2 отсто и ја отфрли можноста за зголемување.
„Како што продолжува закрепнувањето и се елиминираат проблемите со недостигот од понудата, можеме да очекуваме нормализирање на ценовните притисоци врз стоките и услугите“, изјави претседателот на ЕЦБ пред Комитетот за економски и монетарни прашања на Европскиот парламент, пренесе БНР.
„Очекуваме платите да се зголемат малку повеќе следната година отколку оваа година, но ризикот од секундарен инфлаторен ефект останува ограничен“, рече Лагард.
Зборувајќи за долгорочните перспективи на економското закрепнување по пандемијата, Лагард ги нагласи „солидните“ трошења на потрошувачите, но и недостигот од материјали, опрема и работна сила, што негативно влијаеше на индустриското производство.
Инфлацијата во еврозоната сега е највисока од 2008 година, „подгреана“ од повисоките цени на енергијата, прекините на синџирот на снабдување и другите пандемични ефекти.
ЕЦБ мора да одлучи за иднината на своите монетарни стимулации на последниот состанок оваа година во декември, кога ќе ги има новите среднорочни економски прогнози. Нејзината програма за откуп на пандемиски обврзници од 1,85 трилиони евра треба да заврши во март 2022 година.
Лагард, исто така, им потврди на европратениците дека, според ЕЦБ, условите за зголемување на каматните стапки во еврозоната најверојатно нема да бидат исполнети во 2022 година.