Специјалниот претставник на ЕУ за дијалог Белград-Приштина и други регионални прашања на Западен Балкан, Мирослав Лајчак, ќе го посети Косово на 31 мај и 1 јуни 2021 година, каде ќе му се придружи заменикот помошник државен секретар на САД, Метју А. Палмер, соопшти канцеларијата на ЕУ во Косово.
За време на дводневната работна посета, Лајчак и Палмер ќе се сретнат со претседателот Вјоса Османи Садриу, премиерот Албин Курти, првиот вицепремиер за европски интеграции, развој и дијалог Бесник Бислими и министерот за надворешни работи и дијаспора, Доника Гервала-Шварц.
Во соопштението се вели дека Лајчак ќе се сретне и со претставници на меѓународната заедница на Косово и ќе им се обрати на шефовите на мисиите на ЕУ.
Заедничката прес-конференција на Лајчак и Палмер е најавена во вторник, 1 јуни.
Пред два дена, Лајчак се состана со Палмер во Брисел и разговараше за ситуацијата на Западен Балкан и дијалогот Косово-Србија.