Изјавите на претставниците на НАТО за превентивни напади врз Руската Федерација се неодговорни, се гледа дека тие „не помирисале барут, туку сакаат да си ги соберат ловориките“, изјави министерот за надворешни работи на Русија, Сергеј Лавров.
„Тоа го изјави еден апсолутно неодговорен адмирал. Таму има многу луѓе кои не ни помирисале барут, но ставиле еполети“, изјави шефот на руската дипломатија во интервју за телевизијата „Русија 24“.
Коментирајќи ги наводите на „Њујорк тајмс“ дека некои функционери од САД и Европа се за предавање на нуклеарно оружје на Украина, Лавров рече дека „политичарите се тука постојано да привлекуваат внимание кон себе“, пренесе РИА Новости.
Според него, и во Русија има политичари кои многу зборуваат за ескалација.
„Одлуката ја носи врховниот командант. Се надевам дека тоа треба да биде случај и во САД“, рече Лавров.
Претходно, на конференција во Центарот за европска политика во Брисел, шефот на Воениот комитет на НАТО, адмирал Роб Бауер, повика на производство на повеќе оружје за да се извршат прецизни удари длабоко во Руската Федерација во случај на конфликт, пренесува руската агенција.
„Њујорк тајмс“ минатата недела објави дека некои неидентификувани западни функционери навестиле дека американскиот претседател Џозеф Бајден може да и даде нуклеарно оружје на Украина пред да ја напушти функцијата.
Украина го наследи нуклеарното оружје од Советскиот Сојуз по неговиот распад во 1991 година, но го врати според договорот од 1994 година, таканаречениот Будимпештански меморандум, во замена за безбедносни гаранции од Русија, САД и Велика Британија.