Рускиот министер за надворешни работи Сергеј Лавров денеска изјави дека Русија ги проверува информациите дека се регрутираат платеници за испраќање во Донбас во Косово, Албанија и Босна и Херцеговина.
Лавров за РТ изјави дека има информации дека платеници во Косово, Албанија и БиХ се регрутираат и се испраќаат, меѓу другото, во Донбас, со цел Русија да биде исфрлена од рамнотежа, пренесува РИА Новости.
Шефот на руската дипломатија потсети дека рускиот претседател Владимир Путин на прес-конференција по неодамнешната средба со германскиот канцелар Олаф Шолц зборувал за бомбардирањето на Југославија во 1999 година и дека Шолц рекол дека НАТО интервенирал „за да спречи геноцид врз косовските Албанци“.
– Како да тие направија се успешно и сега тој регион цвета – рече Лавров и оцени дека регионот, како што наведе, е далеку од процут.
– Косово и некои други делови од Западен Балкан станаа жариште на криминал. Има терористи, дилери на дрога. Тие регрутираат платеници за да учествуваат во борбени операции кои постепено се разгоруваат, вклучително и САД, рече Лавров.