Данскиот производител на играчки Lego минатата година оствари приход од 74,3 милијарди круни (9,96 милијарди евра), што е за 13 отсто повеќе од претходната година.
Нето добивката се зголеми за пет отсто на рекордни 13,8 милијарди круни (1,85 милијарди евра), објави денеска компанијата, пренесува француската новинска агенција АФП.
Широката и висококвалитетна понуда на Lego се исплатеше минатата година, изјави извршниот директор на компанијата Нилс Кристијансен.
Успехот на компанијата, кој беше донекаде ограничен со послабата продажба во Азија, се издвојува на инаку слабиот пазар на играчки, според АФП.
Според Кристијансен, тие не се загрижени за американските трговски мерки, особено за увозните царини.
„Ваквата неизвесност не е нова. Уверен сум дека и овој пат ќе најдеме начин успешно да се соочиме со ваквите предизвици“, додаде тој.