Данскиот производител на играчки Lego постигна рекордни резултати во првата половина од годината. Приходите изнесуваа 34,6 милијарди дански круни, или околу 4,64 милијарди евра, што е зголемување од 12 проценти во споредба со истиот период минатата година.
Оперативниот профит на Lego се зголеми за десет проценти во споредба со претходната година на девет милијарди дански круни, или околу 1,2 милијарди евра, објави агенцијата Мина.
Според извршниот директор Нилс Кристијансен, ова е „најдобрата прва половина од годината во историјата на компанијата“ – рекорд во однос на приходите, оперативниот профит и заработката.
Lego комплетите инспирирани од цвеќиња, собни растенија и Формула 1 беа многу барани, а компанијата имаше корист и од новите соработки со аниме серијата One Piece и детската програма Bluey.
Во првите шест месеци од оваа година, Lego лансираше рекордни 314 нови комплети и отвори 24 продавници низ целиот свет, вклучително и на пазари како Кина и Индија, каде што традиционално имаше мало присуство.
Кристијансен рече дека Lego ја проширува својата база на клиенти со производи што комбинираат забава и креативност со релаксација.
Ботаничките сетови, како што се букети и собни растенија направени од цигли, станаа популарни кај новите корисници, додека компанијата успеа да се етаблира и во дигиталниот простор преку соработка со Epic Games и нивната видео игра Fortnite.
Најавена е и повеќегодишна соработка со франшизата Pokemon, а првите Lego сетови инспирирани од овој феномен треба да се појават на пазарот следната година.