Oгромно незадоволство од Груевски, но без јасна определба за СДСМ – во такви услови формираме партија не за да го цепиме фронтот на опозицијата, туку за да се детронизира автократот, вели за ДВ активистот Здравко Савески
Третата опција досега во Македонија реално не заживеа, иако имаше бројни иницијативи. Зошто би успеала сега?
Досега се појавуваа само квази-нови трети партии. Формирани од стари политичари. Често со мал углед кај народот. Веќе видени. Па ќе беше чудо ако таквите „нови“ партии успееја. Ние формираме нова партија со нови луѓе, со нови идеи. И наместо, како сите, да се туркаме во центарот, ние ја пополнуваме левицата. Која, жално но вистинито, толку многу години беше празна. Сакаме да направиме промена во корист на обичниот човек, оној што не може да најде работа, а кога ќе ја најде, принуден е да трпи секакво изживување на работното место само за некако да сврзе крај со крај. Имаме волја да работиме во корист на сиромашното мнозинство, а не во корист на богатото малцинство. Имаме и срце тоа да го направиме. И се надеваме дека нашите осиромашени и обесправени сограѓани тоа ќе го поддржат.
Неодамна изјавивте дека се радувате на победата на вашите другари во Грција, мислевте конкретно на СИРИЗА на Ципрас, кој во меѓувреме доби уште една поддршка на изборите. Ве охрабри ли тоа дополнително за овој чекор, дека е време за такво нешто и во Македонија?
На Македонија и’ треба силна левица. Силна левица му треба на Балканот, и’ треба и на цела Европа. Доста се израдувавме на победата на СИРИЗА во Грција на почетокот на оваа година. Но, ова лето Ципрас многу разочара многумина левичари. Мораше да поднесе оставка кога веќе сметаше дека не може да се спречи притисокот на меѓународниот капитал. Власта не смее да се држи по секоја цена. Ќе го имаме предвид искуството на СИРИЗА, вклучително и позитивните и негативните аспекти на тоа искуство. Едноставно не вреди власта ако си го предал она за што си се залагал.
Повеќе ТУКА