Левица ќе ја оспори владината Уредба за униформата и ознаките на Униформата на полицијата пред Уставниот суд.
Уредбата, велат оттаму, е спротивна на амандманот V од Уставот, согласно кој службен јазик на целата територија е македонскиот јазик и неговото писмо.
– Следствено на тоа, оваа Уредба е спротивна и на Законот за полиција согласно кој, полицијата ја врши унифицирано својата работа на целата територија на државата. Притоа, веќе постои Правилник со кој се уредуваат ознаките на униформата и согласно кој, истите се идентични на целата територија на државата и истите не може да се разликуваат во зависност од општините каде се извршува работата, велат од Левица.
Политичката и општествена застапеност на албанската заедница е остварена и одамна на оптимално ниво, но, таа улога многу долго ја врши истата криминална партија, која непрестано покажува дека не ги штити интересите на албанските жители, туку исклучиво работи на зголемување на расцепот во нашето општество, посочуваат од партијата на Апасиев.
„Прогресивната политика подразбира хомогенизација на чувството на припадност и надминување на потребата за етно-трибалистичко етикетирање на сите аспекти од општествениот живот. Под идејата за инклузивност тлеат вистински апетити за федерализација и конечна формална поделба на политичкиот плен. На крајот на оваа цел, стојат многу поголеми предизвици за инклузија, кои допрва ќе треба да ги решаваме, бидејќи сегашните власти активно работат на разнебитување на заедничките врски. Од највисоко значење е запирање на овие процеси, затоа што македонската државност е загрозена од сите страни – во внатрешната и во надворешната политика, и потребно е да се застане во одбрана на принципите кои ни го сочинуваат суверенитетот“, додаваат од партијата.