Лидерите на 26-те земји-членки на Европската унија денеска поддржаа текст за Украина, во кој се наведува дека ЕУ е посветена на воена и финансиска поддршка на Украина, како и зголемување на притисокот врз Русија, но заедничката изјава не ја потпиша унгарскиот премиер Виктор Орбан.
Текстот, кој е приложен кон заклучоците на Европскиот совет, ја потврдува „континуираната и непоколеблива поддршка на Европскиот совет за независноста, суверенитетот и територијалниот интегритет на Украина во нејзините меѓународно признати граници“.
Истовремено, се оценува дека руската војна во Украина има пошироки последици за европската и меѓународната безбедност и имајќи го предвид новиот моментум за преговори, кој треба да доведе до сеопфатен, праведен и траен мир, укажува на важноста на неколку принципи.
Меѓу овие принципи е дека не може да има преговори за Украина без Украина и дека не може да има преговори кои ќе влијаат на европската безбедност без учество на Европа.
„Украинската, европската, трансатлантската и глобалната безбедност се испреплетени“, се наведува во текстот.
Во него се нагласува дека каков било прекин на огнот може да се случи само во рамките на процес кој води кон сеопфатен мировен договор и се наведува дека секој таков договор мора да биде придружен со „цврсти и кредибилни безбедносни гаранции за Украина кои придонесуваат за одвраќање на идната руска агресија“.
„Мирот мора да ги почитува независноста, суверенитетот и територијалниот интегритет на Украина“, се наведува во текстот.
Понатаму се наведува дека постигнувањето „мир преку сила“ бара Украина да биде во најсилна можна позиција, со силни воени и одбранбени способности како суштинска компонента.
„Ова се однесува пред, за време и по преговорите за ставање крај на војната.
Се најавува и дека ЕУ во 2025 година ќе и обезбеди на Украина вкупно 30,6 милијарди евра и дека ќе продолжи да обезбедува „редовна и предвидлива финансиска поддршка“ за земјата.
Подготвеноста на земјите-членки итно да ги засилат напорите за решавање на итните воени и одбранбени потреби на Украина особено со снабдување на системи за противвоздушна одбрана, муниција и проектили, обезбедување на потребната обука и опрема за украинските бригади и други можни потреби на Украина.
Советот на ЕУ е повикан брзо да ја унапреди работата на иницијативите, особено оние на високиот претставник на ЕУ, за координирање на зголемената воена поддршка на ЕУ за Украина.
Во овој контекст, се нагласува дека ЕУ и нејзините земји-членки се посветени да придонесат за обука и опремување на украинските вооружени сили и да ја интензивираат работата за понатамошна поддршка и развој на украинската одбранбена индустрија и продлабочување на нејзината соработка со европската одбранбена индустрија.
Се наведува и дека ЕУ и нејзините земји-членки се подготвени дополнително да придонесат за безбедносните гаранции на Украина и дека „безбедносните гаранции треба да се преземат заедно со Украина, како и со истомисленици и партнери од НАТО“.
Исто така, се забележува дека воената поддршка и безбедносните гаранции за Украина ќе бидат обезбедени со целосно почитување на безбедносната и одбранбената политика на одделни земји-членки и земајќи ги предвид безбедносните и одбранбените интереси на сите земји-членки.
Нагласено е и дека ЕУ ќе ја интензивира поддршката за реформските напори на Украина на нејзиниот пат кон членство во ЕУ, пренесува „Танјуг“.