Лидерите на земјите од Г7 (Велика Британија, Германија, Италија, Канада, САД, Франција и Јапонија) по самитот во онлајн формат усвоија заедничка изјава за ситуацијата околу Украина, соопшти прес-службата на германската влада по виртуелниот самит на лидерите на Г7.
– Ги осудуваме намерните чекори на Русија насочени кон ескалација, вклучително и делумна мобилизација на резервистите и неодговорната нуклеарна реторика која го загрозува глобалниот мир и безбедност. Повторуваме дека секоја употреба на хемиско, биолошко или нуклеарно оружје од страна на Русија ќе има сериозни последици – се наведува во соопштението.
Земјите од Г7 го поддржуваат „мирното решавање на конфликтот на Украина со Русија“, иако претседателот на Украина Владимир Зеленски претходно потпиша указ за неможност за преговори со претседателот на Русија.
Земјите од Г7 го осудуваат и недвосмислено го отфрлаат рускиот „незаконски обид за анексија на регионите Доњецк, Луганск, Запорожје и Херсон во Украина, покрај Автономната Република Крим и Севастопол“.
Тие наведуваат дека никогаш нема да ги признаат „лажните референдуми кои Русија ги користи за да го оправда тоа“.
Лидерите на Г7 ја изразија својата намера да продолжат да ги поддржуваат акциите на Украина во конфликтот.
Земјите од Г7 апелираа и до Минск „да престане да ѝ помага“ на Москва во спроведувањето на специјалната воена операција во Украина.
Лидерите на земјите од Г7 имаат намера да продолжат со политиката на санкции против Русија и оние кои ја поддржуваат во ситуацијата околу Украина.