Белоруската воздушна одбрана уништи неколку објекти лансирани од Украина над нејзина територија во петокот, а најверојатно станува збор за беспилотни летала, изјави во саботата белорускиот претседател Александар Лукашенко.
Според Лукашенко, „околу десетина“ објекти го нарушиле белорускиот воздушен простор во источниот регион Могилев на границата со Русија, поради што Минск ги ставил своите воздушни сили и воздушна одбрана во состојба на готовност.
„Во 18 часот и 4 минути на височина од еден и пол километар и од далечина од 6,5 километри, противвоздушните сили уништија неколку цели над територијата на Белорусија. Во текот на ноќта и утринава продолжува потрагата по уништеното“, рекол Лукашенко во видеото што го објави државната новинска агенција Белта.
Тој додал дека други објекти „преминале“ кон Русија и подоцна биле уништени во близина на рускиот град Јарослав.
Руското Министерство за одбрана претходно во саботата објави дека руските сили пресретнале шест беспилотни летала во регионот Јарослав.