Цените на билетите за Лувр во Париз ќе се зголемат за 45 проценти за повеќето посетители надвор од Европската Унија, одлучи одборот на директори на еден од најпознатите и најпосетуваните музеи во светот.
Почнувајќи од следната година, туристите од голем број земји, вклучувајќи ги САД, Велика Британија и Кина, ќе мора да платат 32 евра наместо претходните 22 евра за влез во музејот.
Се очекува музејот да заработува милиони евра годишно од зголемувањето (проценето на околу 20 милиони евра) за финансирање на реконструкцијата на познатата галерија.
Обезбедувањето и раководството на музејот се најдоа на удар по грабежот преку ден во октомври, кога банда од четири члена украде накит во вредност од околу 88 милиони евра и избега за само неколку минути.
Досега се уапсени четири лица – тројца мажи и една жена – под сомнение за грабежот.
По грабежот, беше спроведена анализа, која утврди дека музејот нема соодветни безбедносни системи и дека голем дел од опремата е застарена.
Од 14 јануари 2026 година, посетителите од земјите надвор од Европската економска зона, во која се вклучени земјите-членки на Европската унија, како и Исланд, Норвешка и Лихтенштајн, ќе плаќаат дополнителни 10 евра за влез во Лувр.
Во 2024 година, Лувр го посетиле речиси девет милиони луѓе, од кои околу 70 проценти биле од странство.
Повеќето посетители доаѓаат од САД, додека околу шест проценти доаѓаат од Кина, според податоците на музејот.
Проблемот со капацитетот на музејот и големите гужви одамна се посочуваат.
Посетителите често се жалат на преполни галерии и долги редици, особено во делот каде што е изложена една од најпознатите слики на сите времиња – Мона Лиза.
Порано оваа година, францускиот претседател Емануел Макрон и Лувр најавија реновирање на музејот и предложија зголемување на цените на билетите за посетителите кои не се од ЕУ во 2026 година.
Макрон, исто така, објави дека едно од најважните уметнички дела во човечката историја – Мона Лиза – ќе биде преместено во нов простор за да се помогне во ублажувањето на проблемот со пренатрупаноста.
Поголемиот дел од 30.000 дневни посетители на Лувр се собираат за да го видат ремек-делото на Леонардо да Винчи.
Мноштво посетители се движат низ Сала Ета, галеријата каде што е изложена Мона Лиза, а многумина успеваат да поминат само неколку моменти пред сликата и да се фотографираат.
Лувр, исто така, најави реновирање на други делови од музејот, како и додавање тоалети и ресторан.
Вкупната цена на реновирањето се проценува на неколку стотици милиони евра.
Порано овој месец, Лувр објави затворање на галерија со експонати од античка Грција поради структурни проблеми.
Истрагата по октомврискиот грабеж покажа дека музејот претходно инвестирал значително повеќе во купување нови уметнички дела отколку во одржување и реставрација на постојните објекти.