Светски познатата пејачка Мајли Сајрус проговори за љубовниот живот на нејзиниот татко, Били Реј Сајрус, кој неодамна ја објави својата врска со британската актерка Елизабет Харли. Во саботното издание на подкастот „Интервју“, Мајли искрено зборуваше за првичната тешкотија да го прифати овој нов момент во животот на нејзиниот татко, особено по разводот од нејзината мајка, Тиш Сајрус.
– На почетокот беше тешко, затоа што реагираш како дете. Но потоа, како возрасна личност си велиш: „Да, тоа е твојот татко, тој исто така заслужува среќа“, – објасни Мајли, пренесува Page Six.
Откако целото семејство се собрало за да го прослави 31-виот роденден на нејзиниот брат Брејсон во мај, односот меѓу Мајли и нејзиниот татко значително се подобрил. Таа признава дека разводот на нејзините родители во 2022 година, по 30 години брак, бил тежок период за неа.
– Мајка ми го сакаше татко ми целиот свој живот. И мислам дека е навистина тешко да се биде во брак со некој од музичката индустрија, ако и сам не си дел од неа. Презедов дел од нејзината болка – вели Мајли.
Но, денес таа гледа поинаку на сè. Вели дека и мајка ѝ, и татко ѝ сега се среќни – секој со својот нов партнер.
– Мајка ми е многу заљубена во мојот очув Дом, кого апсолутно го обожавам. А татко ми… кога ќе го видам и него среќен, можам да кажам дека ги сакам и двајцата како поединци, а не само како „мајка и татко“ – додава таа.
Тиш Сајрус се омажи за актерот Доминик Персел, познат по улогата во серијата Prison Break, во август 2022 година. Во меѓувреме, Били Реј Сајрус кратко беше во брак со пејачката Фајероуз во 2023 година, но нивната врска не траеше ниту една година. Били Реј и Елизабет Харли неодамна објавија заедничка фотографија на социјалните мрежи по повод Велигден, на која се прегрнати. Според извор за Page Six, тие се познаваат со години, а сега, кога и двајцата се слободни, романтиката започнала да цвета, пишуваат медиумите.