Македонија е првата земја од Западен Балкан што го заврши договорот за предфинансирање во рамки на Планот за раст, изјави министерката за финансии Гордана Димитриеска-Кочоска од Брисел, каде учествуваше на Економскиот и финансиски дијалог меѓу ЕУ и партнерите од регионот.
Министерката истакна дека Владата работи со забрзано темпо на исполнување на обврските кон ЕУ, и дека до крајот на минатата година биле изменети 16 подзаконски акти. Единствено се доцнело со новата Уредба за јавни инвестиции, поради преминување на нов централизиран систем за одлучување, како што бара ЕУ.
Фокусот е ставен на подобрување на бизнис-климата, стабилна даночна политика, дигитализација, борба против сивата економија, вложување во човечки капитал, енергетска транзиција и реформи во правосудството.
Во рамки на напорите за зголемување на конкурентноста, преку т.н. унгарски кредит се обезбедени дополнителни средства за македонските компании, насочени кон автоматизација и продуктивност.
Во однос на барањата на НАТО за зголемување на трошоците за одбрана, Димитриеска-Кочоска потсети дека Македонија веќе ги исполнува обврските од 2% од БДП, но доколку се зголемат, ќе треба дополнителни напори и средства, без да се наруши буџетската рамнотежа.
Министерката порача дека Македонија останува посветена на исполнување на европските обврски и очекува државата повторно да биде лидер во регионот.