Францускиот претседател Емануел Макрон остро ги критикуваше социјалните медиуми и технолошките компании, велејќи дека повикувањето на слободата на говорот не може да се користи како изговор за непроѕирни алгоритми што го обликуваат јавниот простор
Зборувајќи за време на дебатата за универзитетската соработка меѓу Франција и Индија, Макрон предупреди на растечкото влијание на дигиталните платформи и системите за вештачка интелигенција, обвинувајќи ги за недостаток на транспарентност и демократска одговорност.
„Некои тврдат дека ја бранат слободата на говорот. Ние сме за слободни алгоритми, целосно транспарентни“, рече Макрон. „Слободата на говорот е чиста бесмислица ако никој не знае како се води низ тој систем“.
Францускиот претседател нагласи дека алгоритмите никогаш не се неутрални и дека нивното влијание врз општеството станува сè помоќно, објави „Политико“.
„Алгоритмите се пристрасни, го знаеме тоа. Кога зборуваме за социјалните медиуми, нивното влијание е огромно. Ако немаме поим како се прават алгоритмите, како се тестираат и каде нè водат, демократските последици можат да бидат многу сериозни“, предупреди тој.
Макрон долго време се залага за построга регулација на дигиталните платформи, особено кога станува збор за транспарентност во начинот на кој содржината им се препорачува на корисниците.
Неговите коментари доаѓаат во време на зголемен политички конфликт меѓу Европа и САД околу регулирањето на технолошкиот сектор.
Администрацијата на американскиот претседател Доналд Трамп често ги опишува европските дигитални регулативи како закана за американскиот концепт за слобода на говорот. Брисел, од друга страна, во последните години гради регулаторна рамка која се стреми да ја ограничи моќта на големите технолошки компании преку закони како што се Општата регулатива за заштита на податоците (GDPR), Законот за дигитални услуги (DSA) и Законот за дигитални пазари (DMA).
Американските претставници и делови од технолошката индустрија тврдат дека европските правила за модерирање на содржините претставуваат форма на цензура, додека европските лидери инсистираат дека ваквите мерки се неопходни за борба против нелегалната содржина и злоупотребата на платформите.
Макрон повторно апелираше за потребата од ограничување на пристапот до социјалните мрежи за помладите корисници, што доби зголемена политичка поддршка во Европа во последните месеци. Потсетуваме, Австралија беше првата земја што ја забрани употребата на социјалните медиуми од страна на лицата под 16 години во декември минатата година.
Дебатата за заштита на децата на интернет оттогаш се интензивираше низ цела ЕУ, а некои земји веќе размислуваат за построги правила за проверка на возраста и користење на социјалните медиуми.