Цените на нафтата благо паднаа на тргувањето во вторникот по нестабилната сесија, која заврши еден ден претходно со нагло повлекување на пазарот од врвовите во текот на денот.
Утринава во 8:15 часот по македонско време, декемвриските фјучерси на Брент паднаа на лондонската берза ICE Futures за 0,04 долари до 85,95 долари за барел. Во понеделникот нивната цена се зголеми за 0,46 долари (0,5%) на 85,99 долари за барел, иако во поголемиот дел од сесијата европскиот репер се тргуваше над 86 долари за барел.
Цената на декемвриските фјучерси за американскиот WTI во исто време во е-трговија на Њујоршката берза (NYMEX) падна за 0,11 долари, на 83,65 долари за барел. Севкупно за претходната сесија, вредноста на овие договори не се промени и остана на 83,76 долари за барел. Во текот на тргувањето, сепак, цената на WTI се искачи над 85 долари за барел, што беше прв пат од октомври 2014 година.
Малиот пад на цената на нафтата во понеделникот и денеска беше олеснет со информациите дека претставници на Иран и на Европската унија ќе разговараат во среда во Брисел. Како и од изјавата на рускиот вицепремиер Александар Новак дека министрите на земјите од ОПЕК + мора да ја задржат претходната одлука за зголемување на производството на нафта, забележува Блумберг.
Сепак, експертите предупредуваат дека рамнотежата меѓу понудата и побарувачката на пазарот на нафта зборува во прилог на натамошни поскапувања.
„Ризикот од скок на цената на нафтата над 100 долари за барел не може да се исклучи“, рече Луиз Диксон, главен нафтен аналитичар во Rystad Energy, истакнувајќи ја силната побарувачка за нафта, особено во азиските земји.