Извршниот директор на Tesla, милијардерот Елон Маск, синоќа на конференцијата TED2022 во Ванкувер призна дека „не е сигурен“ дали навистина ќе може да купи 100 отсто од акциите на Twitter, откако во поднесок до регулаторите откри дека понудил цена од 54. 20 долари по акција, или околу 43 милијарди долари.
Twitter потврди дека добил понуда која Управниот одбор допрва треба да ја разгледа, при што понудената цена по акција е многу пониска од 70-те долари што ги достигнаа минатото лето, пишува CNBC.
Во писмото испратено до извршниот директор на Twitter, Парагу Агравал, Маск наведува дека цената од 54,20 долари по акција е неговата „најдобра и последна“ понуда.
Запрашан од учесник на конференцијата ТЕД дали постои „план Б“ доколку неговата моментална понуда биде одбиена, Маск одговори: „Има“, но одби да даде детали.
И покрај огромното богатство, голем дел од средствата на Маск не се ликвидни, па некои аналитичари се прашуваат како тој ќе ги обезбеди средствата ако неговата понуда биде прифатена, забележува CNBC, додавајќи дека аналитичарите во „Велс Фарго“, на пример, се на мислење дека тој можеби мора да продава акции Tesla „за да го финансира ова преземање.
Еден од учесниците на состанокот во Ванкувер го праша Маск дали „обезбедува финансирање“, алудирајќи на неговиот спор со Комисијата за хартии од вредност (КХВ) од 2018 година, кога на Twitter напиша дека ќе ја трансформира Tesla во приватна компанија, но ги немал потребните средства, но со тој твит предизвикал скок на вредноста на акциите.
„Имам доволно пари. Ќе го реализирам тоа ако е можно“, одговори тој и коментирајќи го претходниот спор со КХВ отиде дотаму што некои во таа комисија ги нарече „гадови“.
Маск ја сподели и својата визија за Twitter доколку ја преземе контролата врз таа социјална мрежа.
„Мислам дека е многу важно да постои инклузивна арена за слобода на говорот“, рече тој, споредувајќи го Twitter со „де факто градскиот плоштад“.
Призна дека има потреба од одредено ниво на умереност на содржината, на пример кога станува збор за експлицитни повици за насилство, додавајќи дека сервисот ќе мора да ги почитува законите на земјите во кои работи.
Тој вели и дека би сакал политиките и алгоритмот на платформата да бидат многу поотворени и попристапни за луѓето да можат да критикуваат и да изразуваат загриженост, а доколку твитот се променил на некој начин, тој верува дека треба да биде придружен со информации што ја објаснуваат причината за промената.
Генерално, Маск рече дека „тајм-аутите“ се попожелни од трајните забрани за учество на некои корисници на таа мрежа.
Twitter не одговори веднаш на барањето на CNBC за коментар.