Уште во 2011 година, кога заврши производството на оригиналниот Tesla Roadster, Илон Маск вети наследник кој ќе биде нешто посебно. Оттогаш поминаа 13 години, а досега видовме само прототип, а тоа беше во 2017 година. Сега се чини дека на чекањето конечно му се ближи крајот.
Неверојатниот родстер со четири седишта треба, според најавите на Маск, да пристигне следната година и да стане автомобил со најбрзо забрзување во светот, дури и побрзо од Nevera.
Во 2017 година, Маск тврдеше дека основниот модел ќе достигне од 0 до 96 km/h за 1,9 секунди. Тоа би било побавно од актуелниот рекордер Rimac Nevera, но Маск во меѓувреме неколку пати ја менуваше приказната и зборуваше за забрзување до 60 милји на час за помалку од 1,5 секунда, за 1,1 секунда, па дури и за помалку од една секунда.
Иако Маск сака да „влета“ со неверојатни и неостварливи прогнози и покрај фактот што „помалку од една секунда“ навистина воопшто не звучи реално, јасно е дека Roadster треба да биде фасцинантно брз автомобил, веројатно побрз од Nevera.
Маск своевремено изјави и дека не сака да ја потврди максималната брзина, но навести дека е над 400 km/h. Маск исто така тврдеше дека Roadster има батерија од 200 kWh и автономија од 1.000 km по полнење, три мотори, погон на сите тркала и систем за векторирање на вртежниот момент. И капацитетот на батеријата звучи крајно нереално, но да ја почекаме премиерата за да видиме што смисли Tesla овој пат.
И конечно би можеле да дознаеме за што се работи следната година бидејќи Маск потврди дека новиот Tesla Roadster ќе започне да се произведува следната година. За време на разговорот со инвеститорите за финансиските резултати на компанијата во првото полугодие, извршниот директор на Tesla рече дека компанијата „го завршила најголемиот дел од развојот“ на следната генерација на Roadster.
Би било конечно и време, бидејќи уште во 2017 година беа отворени преднарачки за кои потенцијалните купувачи требаше да платат депозит од 50.000 долари. Тогаш се споменуваше очекувана цена од 250.000 долари, но стравуваме дека автомобилот на крајот ќе биде значително поскап поради инфлацијата и големиот пораст на цените на автомобилите во последните години.