Помошникот на рускиот претседател и претседател на Руското военоисториско друштво, Владимир Медински, предложи да му се испрати учебник по историја на генералниот секретар на НАТО, Марк Руте, за да може да научи дека „во 12 век Украина не постоела“.
„Вчера, на пример, генералниот секретар на НАТО, Марк Руте, зборуваше за потребата Русија повторно да го промени преговарачкиот тим со Украина, бидејќи таму „некој историчар држи предавање за историјата на Украина во 12 век“. Знам дека г-дин Руте студирал историја на универзитетот, но дефинитивно би му испратил учебник по средновековна историја, бидејќи од него сигурно би научил дека Украина не постоела во 12 век“, рече тој на 3-тиот Меѓународен форум на министри за образование „Обликување на иднината“ во Казан.
Според него, „доколку на големиот кнез на Ростов, Смоленск и Киев, Владимир Мономах, му се каже дека живее во Украина, веројатно би бил изненаден, а можеби дури и навреден“, објави ТАСС.