Германската канцеларка Ангела Меркел денеска изјави дека никој во нејзиниот конзервативен блок никогаш не се сомневал дека се соочуваат со тешка борба за да ја задржат функцијата канцелар, одбивајќи да шпекулира за исходот од федералните парламентарни избори во Германија закажани за 26 септември.
„По 16 години, вие автоматски не се враќате на функцијата канцелар, а тоа им е јасно на сите во ЦДУ и ЦСУ“, рече таа на прес-конференција, додавајќи дека очекува неизвесен исход од изборите, пренесе Ројтерс.
Меркел не се кандидира за петти мандат на изборите, а кандидатот на Конзервативната партија – Армин Лашет се бори со анкетите кои покажуваат дека води кандидатот на социјалдемократите, министерот за финансии Олаф Шолц.
Втората најмоќна фигура во владејачката „голема коалиција“, Шолц, се претставува како кандидат кој е во најдобра позиција да го продолжи курсот поставен од Меркел, кој се уште е многу популарен меѓу гласачите.
Одговарајќи на прашањето на новинарите што најмногу цени кај министерот Шолц, Меркел рече дека двајцата се согласуваат за нешто, а тоа е дека двајцата се држат до своите обврски.
Во вторникот, Меркел апелираше до германските гласачи да го поддржат нејзиниот потенцијален наследник, Лашет, на изборите.