На прв поглед, овој мермерен предмет наликува на едноставен држач за мобилниот уред. Но, всушност, станува збор за нешто сосема поинакво и поиновативно. Именуван „Ovo“, исклучителниот елемент е аналоген звучник за мобилен телефон. Специјално е дизајниран само за последните верзии на телефоните на „Apple“: „iPhone 5s“, како и за поновите модели на „iPhone 6“.

Предметот го изработува занаетчиската компанија, специјализирана за обработка на камен, „Monitillo Marmi“. Изделкан е од само едно парче мермер „Cararra“, со специјална автоматска машина за сечење камен. Интересната форма дозволува предметот да може да се постави и да се користи и во хоризонтална и во вертикална позиција. Изгледот и начинот на изработка покажуваат дека предметот ги спојува во едно традицијата и иновацијата, дигиталниот и аналогниот свет.

Едно сосема обично парче камен, мермер, кое личи како нешто што може да го најдете на плажа, во суштина е мал генијален хај-тек изум. Без разлика на неговата компактна големина, геометријата на предметот значително помага за квалитетен, силен звук. Во составот на звучникот не се вклучени никакви електронски делови и тој работи исклучиво со автоматско ширење на звукот, со што, наместо прекумерно, достигнува пријатно и квалитетно ниво на звукот.