Meta, компанијата која е сопственик на Facebook, Instagram и WhatsApp, ќе се соочи со судење по тужба поднесена од американската Федерална трговска комисија (FTC) со која се бара одвојување на компанијата поради обвинувања дека намерно го спречила развојот на конкуренцијата на пазарот на социјални мрежи со аквизициите на Instagram и WhatsApp.
Судијата Џејмс Бозберг од Вашингтон го отфрли обидот на Meta да ја прекине тужбата и дозволи FTC да го продолжи случајот, кој беше поднесен за време на администрацијата на Трамп.
FTC тврди дека Meta, тогаш позната само како Facebook, го купил Instagram во 2012 година и WhatsApp во 2014 година по високи цени за да ги елиминира заканите од растечката конкуренција, наместо да се натпреварува со нив преку свои услуги. Покрај овие обвиненија, FTC првично тврдеше дека Meta дополнително ја зацврстува својата позиција со ограничување на пристапот до својата платформа на развивачите на апликации, но судот го отфрли тој дел од случајот.
Meta се брани со тврдење за бенефиции за потрошувачите
Meta рече дека се сигурни дека доказите во судот ќе покажат како набавките на Instagram и WhatsApp биле од корист за пазарот и за корисниците, давајќи повеќе можности преку нивните платформи. FTC, сепак, го гледа судењето како клучен чекор кон враќање на слободната конкуренција и ограничување на монополот што тврди дека Мета го има на социјалните мрежи.
На судењето Meta нема да има можност да го искористи аргументот дека купувањето на WhatsApp ја зголеми конкуренцијата со Apple и Google, бидејќи судијата Бозберг го отфрли тој дел од аргументот. Деталите за судската одлука ќе бидат објавени во наредниот период, откако Meta и FTC ќе ги отстранат доверливите информации од документите.
Битка против технолошките гиганти
Оваа тужба е само еден во низата случаи што FTC и американското Министерство за правда во моментов ги водат против големите технолошки компании. Покрај Meta, тужени се и Apple, Amazon и Alphabet, а Google се соочува со две тужби поврзани со ограничување на конкуренцијата на пазарот на пребарувачите.
Судскиот процес против компанијата Meta се уште не е закажан, но се очекува овој процес да има значително влијание врз иднината на пазарот на социјалните мрежи и технолошките компании воопшто.