Грчкиот премиер Киријакос Мицотакис денеска изјави дека откажувањето на средбата со неговиот британски колега Риши Сунак поради скулптурите на Партенон е „несреќно“, но додаде дека тоа нема да им наштети на односите меѓу Атина и Лондон долгорочно.
Сунак ја откажа средбата со Мицотакис во Лондон во вторникот, што предизвика лут одговор од грчкиот премиер, кој откажувањето го нарече непочитување и рече дека тоа ги спречило двајцата лидери да разговараат за важни светски прашања, објави „Ројтерс“.
Портпаролот на британската влада подоцна изјави дека Мицотакис, кој даде интервју за Би-Би-Си за време на викендот, не ги исполнил неговите уверувања дека нема јавно да го покрене прашањето за враќање на скулптурите на Партенон од Британскиот музеј во Атина.