Во рамки на проектот ,,Изведба на енергетско ефикасни објекти и искористување на обновливи извори на енергија во јавните објекти” направена е замена на столаријата во основното училиште ,,Христо Узунов” во Охрид. Со интервенцијата се обезбедени подобри услови во процесот на учење на 1.127 ученици и работење на 80 вработени во училиштето. Се проценува дека заштедата на енергија ќе биде најмалку 20%.
– Во рамки на проектот направени се интервенции на седум јавни објекти во шест општини од Југозападниот плански регион. По педесет години покрај ОУ „Христо Узунов” интервениравме и во ЈОУДГ „8-ми Март”-Струга, Административната зграда-општина Струга, ОУ „Ристе Ристески” во Дебар, Културно-историскиот објект-Дебрца, Домот на култура – Вевчани, и ОУ „Санде Штерјоски”-Кичево, пред се во намалување на трошоците за топлинска енергија. Со ова покажуваме дека приоритет ни се иднината на земјава, а тоа се младите, преку проектот на учениците им овозможиме училиштата кои што се како нивен втор дом во кој го градат своето знаење да им направиме да им биде удобно и пријатно за престој, појасни министерот за локална самоуправа, Горан Милевски.
Заменети се дотрајаните прозори и врати во основното училиште Христо Узунов во Охрид, со цел намалување на потрошувачката на електрична и топлинска енергија. Со интервенциите направена е демонтажа на 163 стари прозорци, изработка и поставување на нови ПВЦ прозорци, поставени внатрешни парапетни даски со должина од 42 метри, солбанци со должина од 42 метри, обработени се и малтерисани ѕидовите околу прозорците и поставени се ПВЦ лајсни во должина од 230 метри. Исто така направена е замена на три влезни врати со нови ПВЦ врати. Новите прозорци и врати се двојно застаклени со термоизолациско стакло, опшиени со ПВЦ рамка, со исполна од инертен гас аргон помеѓу стаклата кој има функција на изолатор. Ваквите прозорци и врати претставуваат термопакети кои обезбедуваат зголемена топлинска и звучна изолација, се енергетски ефикасни, имаат голема отпорност спрема атмосферските влијанија и се долготрајни.
Весна Целеска заменик директорка во училиштето Христо Узунов во Охрид и наставник по историја по предметна настава вели дека среќни се што се подобруваат условите на професорите и учениците во училиштето.
– Со реновирањето во зимскиот период училиштето за 40 насто температурата е повисока, тоа значи дека загревањето во училиштето е подобро. До сега имавме прозори кои што беа целосно затворени, немаше ниту провев, токму ова ни значи во време на пандемија дел од наставата да се одвива непречено. Учениците кои што посетуваат настава со физичко присуство се премногу задоволни затоа што и самиот лик на училиштето се промени со промената на дограмата. Среќни сме што се подобруваат условите во училиштето на професорите и на учениците бидејќи тие се јадрото на државата, потенцираше Целеска.
– Во Југозападниот регион имавме предлог проекти, овој проект беше еден од приоритетните кој беше изгласан од заедницата во широка консултација, така што од националниот совет беше прво рангиран. Преку проектот направени се интервенции во 6 општини поточно во 7 јавни објекти, еден од нив е и ова училиште. Вкупната вредност на сите објекти изнесува 17 милиони денари, додаде директорката на Југозападен плански регион, Мирјана Лозаноска.