Минималната бруто плата за 70.000 работници во Хрватска ќе се зголеми на 1.050 евра следната година, потврди денес во Брисел хрватскиот премиер Андреј Пленковиќ, цитиран од хрватската државна телевизија ХРТ.
Одлуката е донесена откако работодавците ја повикаа владата да го одложи зголемувањето на минималната плата во интерес на инвестициите и зачувувањето на работните места.
Владата утре ќе одлучи за минималната плата за следната година. Минималната плата моментално е 970 евра бруто, а синдикатите побараа таа да се зголеми на 1.130 евра.
Премиерот Андреј Пленковиќ рече дека предлогот за плата е даден по многу внимателно разгледување на неколку предлози. Тие се дадени од посебна комисија во која се вклучени претставници на синдикатите, претставници на работодавците, професори и експерти. Владата и разни министерства прават проценка врз основа на нивните предлози.
„Сметавме дека е соодветно бруто платата да биде 1.050 евра за следната година. Значи, ова е износот што владата треба да го прифати. Како и секоја година, ние сме подготвени да ги усвоиме таканаречените придружни мерки за поддршка на работодавците кои исплаќаат минимална плата“, рече премиерот Пленковиќ.