Министерството за одбрана по неколкуте обиди на СДСМ за дискредитација на сето она што министерството и владата го преземаат за унапредувањето на стандардот на припадниците на АРМ, воопшто не е изненадено што повторно во јавноста се презентираат празни зборови без основа во реалноста, велат од МО.
„Во однос на целокупниот капитален проект „АРМ – мој вистински дом“ и сето она што досега е направено, единствено оваа партија припадниците на АРМ ги поистоветува со бројки. Очигледно, принципот на јавност, отвореност, транспарентност и еднакви можности за сите припадници на АРМ, на членовите на СДСМ им е апсолутно непознат“, реагираат од МО на прес конференцијата на СДСМ.
„АРМ- мој вистински дом“, според Министерството, нуди можности за припадниците на АРМ како никогаш досега во 24-годишната историја на Армијата.
Ние одговорно тврдиме дека секој припадник на АРМ може да биде дел од овој проект. И околу 300 припадници веднаш препознаа дека ова е вистинскиот начин да им се реши станбеното прашање. Ако има поголем интерес, ќе се градат и повеќе станови“, соопшти Министерството за одбрана.
Отаму прашуваат зошто опозициската партија кога беше предводник на владата не излезе во пресрет на припадниците на АРМ со ниту еден проект и зошто тогаш не понудија начин за решавање на ова горко прашање за војниците.