Министрите за одбрана на земјите од Г7 денеска во заедничка завршна декларација изразија загриженост за ризикот од натамошна ескалација во Либан и ја изразија својата поддршка за мисијата УНИФИЛ во таа земја.
„Ја изразуваме нашата загриженост за сите закани за безбедноста на УНИФИЛ. Безбедноста на мировниците е должност на сите страни во конфликтот. Исто така, ја повторуваме важноста на поддршката на УНИФИЛ и на либанските вооружени сили во нивната улога за обезбедување на стабилноста и безбедноста на Либан“, се наведува во декларацијата.
Италијанскиот министер за одбрана Гидо Крозето на прес-конференција изјави дека Г7 силно ја поддржува потребата од итен прекин на огнот, ослободување на сите заложници и значително зголемување на протокот на хуманитарна помош за цивилното население, пренесува Анса.