Принцот Хари тврди дека имал доволно материјал за „две книги“, а некои работи не ги вклучил во мемоарите бидејќи татко му и брат му никогаш нема да му простат.
Тој за „Дејли Телеграф“ изјави дека има некои работи за кои „не сака светот да знае“.
Посочи и дека бара извинување од членовите на семејството за неговата сопруга Меган.
Мемоарите „Spare“, објавени минатата недела, станаа најбрзо продаваната нефикциона книга во Велика Британија на сите времиња.
Во мемоарите тој упати низа обвинувања за однесувањето на членовите на кралското семејство, како и за траумата од смртта на неговата мајка, принцезата Дијана, неговите борби со менталното здравје, изолираниот живот што го водел пред да ја запознае Меган, а пишува и за распадот на односите со членовите на семејствата.
Палатата Кенсингтон, каде што живее неговиот брат принцот Вилијам, и Бакингемската палата, каде што сега живее неговиот татко, кралот Чарлс III, рекоа дека нема да ги коментираат мемоарите на принцот Хари.
Во интервју за „Телеграф“, војводата од Сасекс, што е официјална титула на принцот Хари, рече дека „не се обидува да ја урне монархијата“, туку „се обидува да ги спаси од самите себе“.
Принцот Хари рече дека му открил некои работи на мемоаристот Џ. Р. Морингер да го разбере контекстот, но дека „апсолутно нема шанси“ да влезат во книгата.
„Тоа можеше да бидат две книги, така да се каже“, рече тој и додаде дека првата верзија е 800 страници, двојно повеќе од печатеното издание.
„Имаше некои детали што ги споделив со Моринџер, но му реков: „Види, ти го кажувам ова за контекст, но нема шанси тоа да биде во книгата“.
Тој рече дека е невозможно да се раскаже приказната без членовите на неговото семејство во неа, „бидејќи тие играат клучна улога во неа, но и затоа што треба да се разберат сите ликови во книгата“.
„Но, има некои работи што се случија, особено меѓу мене и мојот брат, и до одреден степен меѓу мене и татко ми, за кои едноставно не сакам светот да знае. Мислам дека никогаш нема да ми простат“, рече Хари.
„Можеби некој сега би можел да каже дека поради напишаното, сигурно никогаш нема да ми простат. Но, јас гледам на тоа вака: подготвен сум да им простам за сè што ми направија, и би сакал тие навистина да седнат со мене и да имаат правилен разговор и наместо да кажат дека сум во заблуда и параноичен, всушност, ајде да седнеме и детално да разговараме за се, бидејќи она што навистина би го сакал е малку одговорност. И извинување за мојата сопруга“.
Меѓу тврдењата изнесени во книгата, Хари напиша дека Вилијам бил критичен за неговиот брак со Меган Маркл, опишувајќи ја како „комплицирана“, „неразумна“ и „нечувствителна“.
Принцот Хари го обвини и неговиот брат дека физички го нападнал.
Тој за „Телеграф“ изјави дека „ниту една институција не е имуна на критики и испрашувања“ и тврди дека само 10 проценти од контролата под која тој и неговата сопруга да биле применети и на другите членови на кралското семејство, „сега немаше да бидеме во овој хаос“.
Додаде и дека чувствува одговорност кон децата на Вилијам, „знаејќи дека барем едно од тие три деца ќе заврши како мене – како резервна копија“.
„И тоа ме боли, тоа ме загрижува“.