Сè уште е рано да се контактира Бугарија, и други земји, за евентуално прелетување на авионот на рускиот претседател Владимир Путин над нејзиниот воздушен простор на пат кон Унгарија, каде што треба да се сретне со американскиот претседател Доналд Трамп, објавија денес од Москва.
Рускиот заменик-министер за надворешни работи Александар Грушко одговори на прашање од државната агенција РИА Новости дали Министерството за надворешни работи во Москва веќе имало контакти на темата за претседателскиот авион на Путин со Бугарија и уште две земји – Полска и Романија. Тој само изјави: „Сè уште е рано“.
РИА Новости потсетува дека Бугарија, Полска и Романија, земји од НАТО, ги одделуваат Русија и Унгарија.
Темата се појави откако американскиот претседател Доналд Трамп и неговиот руски колега Владимир Путин, по телефонскиот разговор на 16 октомври, објавија дека веднаш ќе почнат да подготвуваат нова средба меѓу двајцата, која би можела да се одржи во Будимпешта.
Кратко потоа, унгарскиот премиер Виктор Орбан објави дека наредил создавање организациски комитет за подготовка на самитот во Будимпешта. Според него, оваа работа започнала во четврток навечер.
А вчера, Европската комисија потсети дека рускиот претседател Владимир Путин и министерот за надворешни работи Сергеј Лавров имаат замрзнати сметки во ЕУ, но не и забрана за патување во Заедницата.