Зохран Мамдани, муслимански имигрант кој се кандидира за градоначалничкото место на Демократската партија во Њујорк, е во водство во најновите анкети.
Мамдани беше аутсајдер на почетокот на кампањата, но стана вирален на социјалните мрежи откако го искажа својот став за Израел во дебата, која беше поддржана од многу млади њујорчани.
Покрај тоа, неговите ветувања за намалување на трошоците за живот во еден од најскапите градови во светот и за подобрување на јавниот превоз дадоа резултати и ја зголемија неговата популарност.
Така, Мамдани од целосен аутсајдер се претвори во лидер пред претходниот фаворит, Ендру Куомо, поранешниот гувернер на државата Њујорк, според најновите анкети.
Најновата анкета, спроведена од фирмата Public Policy Polling, покажува дека Мамдани има 35 проценти поддршка, додека Куомо е на 31 процент. Другите кандидати се далеку под двата кандидата.
Иако ова се прелиминарни и внатрешни избори во рамките на Демократската партија, досегашната пракса покажа дека кандидатите од оваа партија победуваат на градоначалничките избори без поголеми проблеми.
Во 2021 година, актуелниот градоначалник Ерик Адамс, кој ќе биде независен кандидат на овие избори откако ја напушти Демократската партија, освои дури 66 проценти од гласовите и лесно го победи Кертис Слива од Републиканската партија, кој повторно ќе биде кандидат на овогодинешните избори.
Според американските медиуми, потенцијалната победа на Мамдани би била јасна порака до Демократската партија во контекст на идната насока на партијата.
Многу аналитичари ја гледаат оваа трка како борба помеѓу „старата“ Демократска партија, претставена од Куомо, и „младите надежи“, претставени од Мамдани, како прогресивен социјалист.
Вреди да се напомене дека внатрешните избори на Демократската партија ќе се одржат на 24 јуни, со услов дека доколку ниту еден кандидат не освои повеќе од 50 проценти од гласовите во првиот круг, двајцата со најмногу гласови ќе одат во вториот круг.
Изборите за градоначалник на Њујорк треба да се одржат на 4 ноември годинава.