Првиот ЛГБТ државен хотел ќе биде отворен наскоро во Хавана, објави кубанската воена туристичка групација Гавиота, која ќе управува со хотелот во соработка со шпанскиот ланец „Axel Hotels“.
Хотелот Телеграфо Аксел Хавана, кој сега е во завршна фаза на реновирање, постоел и порано, но немал специфична клиентела. Сместено е во историскиот центар на главниот град, многу близу до Капитол.
После работите што се при крај, 63 соби и разни услуги ќе бидат достапни за туристите кои ја посетуваат Куба. Axel Hotels сака да се позиционира како прва референтна група во светот насочена кон геј популацијата, со низа квалитетни производи и услуги.
Средината на мај обично е време кога ЛГБТ заедницата во Куба излегува на улица за да ги потврди своите права. Настанот е откажан трета година по ред, во 2019 година официјално поради „тензии во меѓународен контекст“, и во 2020 и 2021 година поради пандемија на коронавируси.
Предлогот за измена на уставот на земјата ја отвори вратата за хомосексуални бракови, но тоа беше повлечено во финалната верзија одобрена во 2019 година, по спротивставувањето на црквата што ја водеше кампањата против тој предлог.
Новиот закон за семејство треба да вклучува истополови бракови и наскоро да биде ставен на референдум. Доколку биде одобрен, тоа би бил вистински пресврт на островот каде се стигматизирале сексуалните малцинства во 60-тите и 70-тите години на минатиот век, а хомосексуалците биле малтретирани, па дури и затворени во логори за „превоспитување“.