Колку пати во последните неколку години сме слушнале дека цените на недвижностите „вртоглаво растат“ и дека е речиси невозможно да си дозволите да купите стан. И колку ќе им биде тешко на помладите да стекнат нешто во нивна сопственост.
И тоа е точно, кога ќе погледнете колку чини метар квадратен стан, а дополнително ви се нуди паркинг место во зградата, за што честопати е потребна дополнителна доплата до десет отсто од вредноста на купениот „покрив над твојата глава“.
Дека тоа не е само кај нас не е многу утешно, но сепак, ви пренесуваме вести од „белиот свет“. Да речеме, во Њујорк, местото за вашиот автомобил стана толку ексклузивно што вистинското прашање е дали воопшто сакате да го поседувате возилото.
Зградата „150 Чарлс“ е луксузен облакодер од 15 ката. Изграден е од инвеститорот Алекс Виткоф. Зградата има импресивен изглед и ентериер дизајниран од Алан Ванченберг. Ова го направи нов дом за многу светски познати ѕвезди. Во него живее самиот сопственик Виткоф, а друштво му прават светски ѕвезди како Бен Стилер, Џон Бон Џови и Ирина Шајк. Сега секој од сопствениците на апартмани доби можност да купи паркинг место во гаражата.
Сепак, цената може да биде пречка бидејќи Алекс Виткоф секое место го процени на 500.000 долари (околу 453.000 евра). Цените се астрономски, тоа е сигурно. Сепак, сигурно е и дека зградата е навистина луксузна. Некои апартмани нудат поглед на реката Хадсон, а жителите можат да користат базен, теретана, област за јога или сауна.
Дали половина милион долари за место во гаража ви изгледаат многу? Па, да речеме, најскапиот стан во оваа зграда чини шест милиони долари, а најевтините станови се околу 1,5 милиони долари. Сега и тие половина милион не ви изгледаат премногу, бидејќи тоа е прилично привлечна цена на оваа локација. Посебно имајќи ги предвид проблемите со паркирањето во Њујорк. А бројот на слободни места е доста ограничен, бидејќи слободни се само 92 места.
Само замислете дека имате неколку возила и ви требаат две или три места.