На светските берзи, цените на нафтата потонаа за повеќе од 10 отсто минатата недела, поради стравувањата дека трговската војна би можела да предизвика рецесија во светската економија, како и поради најавата од Организацијата на земјите извознички на нафта (ОПЕК) за зголемување на производството.
Цената на барел на лондонскиот пазар падна за 10,9 отсто, достигнувајќи 65,58 долари, додека на американскиот пазар барелот поевтини за 10,6 отсто, на 61,99 долари, пренесува Хина.
Станува збор за најголем неделен пад на цените во изминатите една и пол година. Во петокот, во еден момент, цените достигнаа најниски вредности во последните четири години — 64,03 долари на лондонскиот, односно 60,45 долари на американскиот пазар.
Остриот пад на цените уследи откако американскиот претседател Доналд Трамп најави драстични царини — 10 отсто на целиот увоз во САД, како и дополнителни реципрочни царини за голем број земји со кои САД имаат трговски дефицит.
Како одговор, Кина најави контрамерки — царини од 34 отсто на целиот увоз од САД, идентични на оние што Трамп ги воведе за кинеските производи. Пекинг внимателно ги следи потезите на Вашингтон, а Трамп претходно веќе воведе 20-процентни царини на увозот од Кина, на што Кина брзо возврати со иста мерка.
Ескалацијата на царинската војна меѓу двете најголеми светски економии, според инвеститорите, може да предизвика прекини во синџирите на снабдување и меѓународната трговија, зголемување на инфлацијата и забавување на глобалниот економски раст — па дури и рецесија. Дополнително, голем број други земји, вклучително и Европската унија, најавија сопствени контрамерки на американските царини.
„Агресивниот одговор на Кина на американските царини речиси сигурно потврдува дека се приближуваме до глобална трговска војна без победници, со негативни последици за глобалниот економски раст и побарувачката за клучните суровини, како што се нафтата и нафтените деривати“, објаснува Оле Хансен од Saxo Bank.
Дополнително, ОПЕК најави значително зголемување на производството. Организацијата и нејзините сојузници во мај одлучија да го зголемат производството за 411.000 барели дневно, откако претходно најавија зголемување од 135.000 барели.
Поради зголемениот ризик од рецесија, многу аналитичари во последните денови ги намалија своите прогнози за побарувачката и цените на нафтата.