Невидените нивоа на загаденост на воздухот во Лахоре, вториот по големина град во Пакистан, ги принудија властите да преземат итни мерки, вклучително и затворање на основни училишта и издавање наредби за работа од дома.
Како што пренесува РСЕ, индексот за квалитет на воздухот во градот со повеќе од 14 милиони луѓе во близина на границата со Индија се искачи над 1.000 на 3 ноември, што е далеку над нивото од 300 кое се смета за „опасно“, според швајцарската компанија IQAir.
Регионалната влада на Пенџаб го нарече загадувањето „невидено“ – обвинувајќи ги загадувачите од гасовите од дизелот, чадот од процесите на согорување на земјоделството и греењето.
IQAir соопшти дека нивото на ситни честички (PM2,5) – што предизвикува најголема штета на здравјето на жителите – во Лахоре во моментов е 44,4 пати поголемо од годишните упатства за квалитетот на воздухот на Светската здравствена организација.
Загадувањето и поврзаните здравствени ризици долго време се проблем за Лахоре и другите градови во регионот. Властите во Лахоре ги затворија основните училишта на една недела и ги повикаа родителите да обезбедат нивните деца да носат маски.
„Временските прогнози за следните шест дена покажуваат дека шемите на ветерот ќе останат исти. Затоа ги затвораме сите јавни и приватни основни училишта во Лахоре на една недела“, изјави за АФП Јахангир Анвар, висок функционер за заштита на животната средина во Лахоре.
Маријум Ауранџеб, висок министер на провинцијата Пенџаб, ги повика сите жители да останат во затворени простории и да ги држат вратите и прозорците затворени.
Таа додаде дека од 4 ноември 50 отсто од вработените во државните и приватните канцеларии ќе добијат мандат да работат од дома.
Официјалните лица рекоа дека условите ќе бидат разгледани на 10 ноември.
Аурангзеб ја припиша опасната ситуација на ветровите кои носат загадувачи од соседна Индија, заедно со локалните фактори.
„Ова не може да се реши без разговор со Индија“, рече таа.
Во извештајот за 2019 година, Институтот за енергетска политика на Универзитетот во Чикаго напиша дека „жителите на градови низ Азија ја плаќаат највисоката цена“ за загадувањето.
„Ако сегашните концентрации на загадениот воздух продолжат, просечниот човек во поголемите азиски градови како Пекинг, Лахоре и Делхи ќе живее околу пет години помалку отколку ако нивниот воздух ги исполнува упатствата на Светската здравствена организација“.