Шест месеци по ангажманот на севернокорејските сили во војната во Украина, нивните борбени капацитети се значително подобрени, а воените загуби растат. Според извештај на јужнокорејската разузнавачка служба, објавен од пратеникот Ли Сеонг-квен, Северна Кореја досега загубила околу 4.700 војници, од кои 600 се потврдени како загинати. Ли, член на парламентарниот комитет за разузнавање, информираше новинари по брифингот дека околу 2.000 ранети севернокорејски војници биле евакуирани назад во татковината по воздушен и железнички пат во периодот од јануари до март. Според него, тие се сместени во изолација во Пјонгјанг и други региони на земјата. Починатите биле кремирани во Русија, а урните со нивната пепел биле вратени во Северна Кореја.
Подобрување на борбените способности
„Се проценува дека нивните борбени способности значително се подобрија во последните шест месеци. Почетното неискуство е намалено, а војниците покажуваат се поголема умешност во користење на нови системи на оружје, вклучително и беспилотни летала“, изјави Ли.
Северна Кореја, според информациите, досега распоредила околу 18.000 војници во две фази за поддршка на руските сили, особено во регионот на Курск. Откако руските сили повторно го зазедоа Курск во март, бројот на директни судири се намалил. Иако засега нема индиции за трета фаза, не се исклучува можноста за ново распоредување. Сепак, присуството на севернокорејските војници не помина без инциденти. Според разузнавачките податоци, сè почесто се пријавува недолично однесување меѓу припадниците на севернокорејските сили, вклучувајќи пијанство и кражба.
Херои или жртви?
Сеул претходно објави дека припадниците на севернокорејските специјални единици добиле наредби да извршат самоубиство доколку се соочат со можност за заробување. Оваа недела, Пјонгјанг за првпат јавно призна дека испратил воени сили во Русија за да им помогне на руските трупи. Севернокорејскиот лидер Ким Џонг Ун изјави дека сите оние кои се бореле „за правда“ се херои и гордост на татковината.
Според државната агенција KCNA, наскоро во Пјонгјанг ќе биде подигнат споменик во чест на нивните подвизи. Рускиот претседател Владимир Путин изрази благодарност до Ким Џонг Ун за, како што рече, храброста и придонесот на неговите војници. Двете земји во јуни 2024 година потпишаа договор за стратешко партнерство кој вклучува меѓусебна воена помош во случај на напад врз било која од нив.