Дронови ја нападнале касарната на полицискиот полк во Грозни, Чеченија, потврди чеченскиот лидер Рамзан Кадиров.
Според него, во нападот бил оштетен покривот на зградата, скршени се прозорците, а четворица стражари биле полесно повредени.
„Киев Индипендент“ објави дека ова е трет пријавен напад со беспилотни летала врз Чеченија за време на руската војна против Украина.
Претходниот напад се случи пред неколку дена, а првиот беше пријавен на крајот на октомври годинава.
Според Кадиров, беспилотно летало било соборено над полициската касарна близу 1 часот по полноќ на 12 декември.
„Никој не е сериозно повреден. Четворица чувари се здобија со полесни повреди“, рекол тој.
Инаку, како што понатаму наведува киевскиот портал, целната зграда на полицискиот полк го добила името по Ахмат Кадиров, првиот чеченски лидер кој ја поддржувал Русија.
Истата зграда, наводно, била погодена една недела претходно за време на напад со дрон на 4 декември.
Откако првично не извести за жртви, Кадиров подоцна тврдеше дека украинските воени затвореници биле убиени, фалејќи се дека биле користени како жив штит.
Кадиров ја обвини Украина за нападот со дрон, иако Киев не ја презеде одговорноста за нападот.
Украински разузнавачки извор изјави за „Киев Индипендент“ дека ударот на 29 октомври најверојатно дошол од соседните републики Дагестан или Ингушетија.