Во НАТО има планови да му предложи на американскиот претседател Доналд Трамп значително проширување на военото присуство на Алијансата на Арктикот, а како што дознава германската новинска агенција ДПА од кругови на Алијансата, постои надеж дека тоа ќе ја смири дискусијата во врска со Гренланд.
Заднината е дека Трамп својот интерес за најголемиот остров во светот го заснова пред се на американските безбедносни интереси.
Безбедносните интереси на САД би можеле да бидат исполнети со значително посилно присуство на НАТО во регионот, според воената алијанса. Особено што во зголеменото присуство можеа да учествуваат и Американците.
Како што се додава, Трамп со право е загрижен за Гренланд со оглед на руските и кинеските активности на Арктикот.
Според извори на Алијансата, иницијативата за Трамп во моментов е предмет на неформални дискусии. Според тоа, основата за зголеменото присуство би можеле да бидат новите одбранбени планови усвоени во 2023 година.
Овие доверливи документи предвидуваат зголемување на способностите за одвраќање и одбрана на далечниот север.
САД веќе управуваат со базата Питуфик на Гренланд според договорот со Данска.
Договорот, меѓу другото, предвидува системи за ракетно предупредување, како и мисии за противракетна одбрана и набљудување во вселената. Покрај тоа, присутни се и данските вооружени сили – главно преку Арктичката команда во Нуук.
Интересот на Трамп за Гренланд предизвикува конфузија и загриженост, особено што тој неодамна не ја исклучи воената и економската интервенција за преземање на контролата врз најголемиот остров во светот, кој во голема мера е автономен, но официјално и припаѓа на Данска.
Партнерот на НАТО Данска нагласува дека Гренланѓаните сами одлучуваат за својата иднина и можната независност од Данска. Данската премиерка Мете Фредериксен неодамна одржа бројни кризни разговори со шефовите на држави и влади на други европски земји од НАТО.
Гренландската влада постојано нагласуваше дека не сака да биде „данска или американска, туку само територија на Гренланд“.
За НАТО, дебатата за Гренланд е многу експлозивна. Од една страна, Алијансата мора да се плаши за својот кредибилитет ако водечката членка одеднаш се закани со анексија на територијата на друга држава со сила – особено имајќи ја предвид војната на Русија против Украина и претензиите на Кина кон Тајван.
Од друга страна, би било голема катастрофа за НАТО доколку САД се повлечат од Алијансата поради таков спор, бидејќи одвраќањето на НАТО се базира првенствено на американскиот нуклеарен арсенал и силата на неговите конвенционални вооружени сили.
Дали плановите за понуда на Трамп ќе бидат спроведени ќе зависи, меѓу другото, од тоа дали републиканецот е навистина загрижен првенствено за американските безбедносни интереси во регионот, сметаат дипломатите.
Ако и наоѓалиштата на суровини играат улога, иницијативата може да биде осудена на неуспех.