Истражувањата покажуваат дека промените во белите дробови можат да се појават и кај луѓе кои имаат симптоми на инфекција со коронавирус, но биле негативни за време на тестирањето.
Ковид-19 може да ги оштети белите дробови дури и пред ПЦР-тестот, што е златен стандард за дијагностицирање на коронавирус, да покаже присуство на инфекција. Промени во белите дробови, покажуваат истражувањата, може да се појават и кај луѓе кои биле негативни за време на тестирањето. Имено, ПЦР тестот не е 100 процентен сигурен.
Во околу 19 проценти од случаите, тој дава лажен негативен резултат и кај заразените лица. За да може третманот на ковид 19 да биде што поуспешен, а промените во белите дробови да бидат забележани што е можно порано, потребно е да се снимат белите дробови на лице за кое постои сомневање дека има коронавирус.
Радиолошки преглед на белите дробови треба да се изврши кај сите пациенти кои имаат симптоми или биле во контакт со заразено лице, доколку има сомнеж во оштетување на белите дробови предизвикано од вирусот, како и да се откријат компликации и да се следи текот на болеста.
Во 94 проценти од случаите, скенерот открива промени во белите дробови предизвикани од коронавирусот
Скенер за градите е радиолошка дијагностичка метода која има многу висока чувствителност (околу 94 проценти) и овозможува рано откривање на промените во белите дробови. Затоа, Европското друштво за торакална медицина и радиологија го вклучи скенерот како радиолошки метод на избор при откривање на белодробни манифестации на инфекција со коронавирус.
Рендгенот е важен за следење на текот на болеста
Рендгенот има ниска чувствителност. Тој не открил промени во белите дробови кај дури 20 проценти од позитивните пациенти со благи симптоми, покажуваат истражувањата. Ова не значи дека рендгенот не се користи при дијагностицирање на коронавирус. Тој е најадекватен кај пациенти на интензивна нега, во следење на состојбата на пациентот и текот на болеста, како и кај пациенти кај кои не е можна употреба на скенер.
Кој треба да направи скенер
Пациентите кои имаат јасни симптоми на респираторна инфекција или влошување на состојбата, мора да бидат упатени на скенер. Исто така, скенерот треба да се направи на сите пациенти кои имаат придружни болести, бидејќи тие го зголемуваат ризикот од развој на тешка форма на КОВИД-19. Овие се сите пациенти со кардиоваскуларни заболувања, белодробни заболувања, дијабетес, дебелина, автоимуни заболувања и малигни заболувања. Скенерот се користи и кај луѓе кои имаат симптоми, а лабораторискиот тест е негативен.
Извор: е-клиника