Соединетите држави не дадоа никакви предлози на самитот во Женева за размена на рускиот блогер Алексеј Навални за некои од руските граѓани кои се наоѓаат во затвори во САД, изјави денеска портпаролот на Кремљ, Дмитриј Песков.
„Не, немаше таков разговор, не беа дадени такви предлози“, рече Песков во интервју за радиото „Ехо на Москва“, објави руската агенција ТАСС.
На прашањето дали Навални може да се додаде на списокот на затвореници што Русија и Соединетите држави можат да ги разменат, Песков рече дека е можно „ако се покаже дека тој е американски државјанин и работи за специјални служби, или поточно, ако официјално го потврдат тоа Американците “.
Според портпаролот на Кремљ, руските и американските претседатели Владимир Путин и Џо Бајден разговарале за Навални за време на состанокот „еден на еден“, а содржината на ваквите разговори „никогаш не се открива целосно“, пренесува Танјуг.
„Тоа прашање го спомена американскиот претседател, а потоа следеше одговорот на рускиот претседател, ништо повеќе“, рече Песков.
Тој исто така изјави дека сè уште нема планови во врска со следната средба меѓу Путин и Бајден.
Говорејќи за движењето на руските трупи во близина на украинската граница, Песков рече дека ова прашање беше споменато на самитот Путин-Бајден, но дека обвинувањата никогаш не биле изнесени на највисоко ниво.
На прашањето дали Путин сака да се сретне со украинскиот претседател Владимир Зеленски, портпаролот на Кремљ рече дека Путин е подготвен за тоа, но дека досега не се преземени конкретни чекори.
Песков, исто така, посочи дека Путин има прецизни информации за Фондацијата за борба против корупција (ФБК), која е поддржана од Навални, и која, како што рече, е призната како невладина и екстремистичка организација во Русија.
Имено, Путин на прес-конференцијата одржана по самитот во Женева рече дека Фондацијата јавно повика на масовни немири во кои биле вклучени и малолетници.
Тој исто така изјави дека Фондацијата дава јавни упатства за правење молотови коктели да се користат против полициските органи и дека објавува лични податоци на полицајци.