Претседателот на Косовската бизнис алијанса, Агим Шахини, изјавил дека Буџетот што вчера го предложи владата на Косово која се уште има технички мандат, може да се гледа само како предлог на една партија, Самоопределување, што, вели тој, може да го направат и други политички партии – а потоа граѓаните на изборите ќе одлучат кому ќе веруваат. Тој предупреди дека одлуката за минимална плата од 500 евра значи ризик од банкрот за многу компании.
„Не можеме да кажеме дека буџетот го предложила функционална влада. Сите големи одлуки мора да се донесат во согласност со процедурите, а ниту една од нив не може да биде проследена со регулативи, како што е усвојување на буџетот во парламентарните комисии, а потоа гласање на пленарна седница. Никој не е против буџет од четири милијарди евра, но мора да се покаже од каде ќе дојдат овие средства. Ова е само предлог што изгледа убаво и ништо повеќе“, рекол Шахини.
Зборувајќи за капиталните инвестиции планирани за 2026 година, Шахини истакнал дека биле предложени капитални инвестиции од околу една милијарда евра, но дека тоа всушност не било планирање.
„Тоа не е планирање, бидејќи кога се планираат инвестиции, тие се познати во центи. Значи, дури и во оваа категорија се покажува дека нема сериозност – 13-тата плата за вработените во јавниот сектор – зошто 13-тата плата треба да се дава на јавниот сектор од даноци собрани од приватниот сектор? Ние, како претставници на приватниот сектор, остро се спротивставуваме на оваа иницијатива, бидејќи тоа се наши даноци“, додал Шахини.
Исто така, како што изјавил, тие имаат резерви во однос на минималната плата.
„Косово сè уште има најниска плата во регионот. Утврдувањето на минималната плата мора да се направи во согласност со сите законски критериуми и со одобрение од сите фактори, вклучително и претставниците на приватниот сектор“, посочил Шахини.
Според Шахини, воведувањето на минимална плата од 500 евра ризикува банкрот на многу компании бидејќи одлуката е донесена без никаква анализа.