Ако некогаш сте подариле некому подарок и веднаш сте се запрашале зошто воопшто сте го купиле, не дозволувајте чувството на срам да ве обзема предолго – веројатно сте биле поимагинативни од принцот Вилијам, пишува „Глоси“.
Кејт Мидлтон пред неколку дена го прослави својот 40-ти роденден, а се уште не се знае со што ја израдувал нејзиниот сопруг на овој важен ден. Сепак, еден подарок што идниот крал на Велика Британија и го дал на својата сакана бил толку бесмислен што тој не можел да остане тајна …
Кога во 2020 година гостуваше во подкастот на поранешниот британски фудбалер Питер Крауч, принцот Вилијам призна дека не е одличен во изборот на подароци за своите најблиски.
Имено, поранешниот спортист изјавил дека случајно три години по ред и купувал ист подарок на сопругата Аби Кленси, а на прашањето дали Вилијам може да го надмине во категоријата најлоши подароци, војводата од Кембриџ рекол:
„Веројатно можам. Еднаш купив двоглед за жена ми“.
Тој откри дека тоа се случило на почетокот на врската и се пошегува дека тоа му помогнало да ја заведе.
Запрашан што мисли Кејт Мидлтон за подарокот и како таа реагираше, Вилијам рече: „Таа ме погледна и беше како „Двоглед е… Што се случува?“… Не помина добро. Немам поим зошто и купив двоглед“.
Како што пишуваат британските медиуми, војвотката од Кембриџ не дозволува нејзиниот сопруг да го заборави тој непријатен момент во нивната врска кога застанал пред неа со двоглед во рацете, но во подоцнежните години „се извадил“ со дарување скап накит.